Sherman Forum 鍾舒漫國際歌迷論壇

標題: (05/10/2010)鍾舒漫泳兒偏僻角落Girl's Talk[3份報導] [打印本頁]

作者: 草食男 時間: 2010-10-5 01:10 標題: (05/10/2010)鍾舒漫泳兒偏僻角落Girl's Talk[3份報導]

Sherman和泳兒齊行街購物。

Sherman承認有心儀對象，但未有拖拍。

自爆已有心儀結婚對象的鍾舒漫（Sherman），相約好姊妹泳兒到潮店血拼，兩人盡顯女人購物天性，Sherman扑錘買了頸鏈及太陽眼鏡，途經一間專賣潮爆男裝內褲專門店時，駐足研究，未知是否揀給「另一半」？

及後Sherman與泳兒到歎糖水，並刻意揀選偏僻角落Girl's Talk，Sherman似是心事重重，又狂發短訊及向泳兒吐苦水，泳兒則拍對方膊頭以示安慰。事後記者致電Sherman，她否認蜜運及有感情煩惱，「都係Girl's Talk，未有感情煩惱，我係有心儀對象，但未有正式男友。（遇到Mr.Right？）物色中﹗」

[ 本帖最後由草食男於 2010-10-5 12:21 編輯 ]

作者: Tako 時間: 2010-10-5 08:15

咁近影佢地兩個都唔知-___-

作者: melody 時間: 2010-10-5 10:51

就连偷影嘅都好鬼靚阿！！！！！！！

作者: 草食男 時間: 2010-10-5 12:07

(05/10/2010)鍾舒漫掃花底褲冧準男友[東方日報]

Sherman到潮店細心研究潮爆男裝「底橫」。

甚少傳緋聞的鍾舒漫（Sherman），早前自爆已有心儀對象，她還到潮店掃潮爆男裝內褲；之後Sherman又相約泳兒歎糖水，但期間似是心事重重，愁容滿面，不斷向泳兒吐苦水，要對方拍膊安慰。

日前自爆有心儀結婚對象的鍾舒漫，入行至今緋聞不多，傳得最盛亦只是與同公司張致恒的緋聞。不過日前Sherman突然自爆已有心儀對象，但就未肯多講半句她的「另一半」，惟日前Sherman以一身型爆Look到尖沙咀潮店「gi+」血拼，甫進商場便發揮女人愛購物的天性，她喪試戴帽子、墨鏡、飾物及吊帶裙，愈試愈興奮，最後她揀了頸鏈和太陽眼鏡。

及後Sherman轉戰男裝部精挑細選，除了睇T恤、外套和長褲外，Sherman經過一間男裝內褲專門店時，亦不禁被花喱花綠款式多樣的潮爆「底橫」深深吸引，還細心地研究挑選，未知是否送給她的「真命天子」呢？

Sherman（左）眼明手快，捉實差點跣腳的泳兒。

Sherman和泳兒爭付款，結果泳兒成功爭贏。

Sherman與泳兒歎糖水，期間Sherman似乎心事重重。

互襯衫爭畀錢
及後她的好姊妹泳兒突然現身，原來兩人一早約好行街，期間兩人替對方扮靚襯衫，離開時更在付款處上演一幕「爭畀錢」，結果泳兒爭贏，場面惹笑。當兩人離開時，身穿厚踭鞋的泳兒落樓梯時，險些樂極忘形仆倒，幸Sherman醒目傍實，未致出醜人前。其後她們孖必到附近商場的食肆，揀了一個偏僻角落歎糖水，Shopping時風騷的Sherman突然滿懷心事，表現愁爆及沉默，不停狂發短訊，泳兒見狀即拍膊安慰，並樂於充當聆聽者，甚至將糖水分給Sherman品嘗，果然姊妹情深。

樂意買貼身物
事後致電Sherman，她否認蜜運，但就表示的確有心儀對象：「但未正式有（男友）。（幫另一半買貼身用品？）如果有男友，幫佢揀埋又有乜所謂？但依家真係未有。（遇到Mr. Right？）物色緊！」至於是否和泳兒吐苦水？她只說：「都係Girl's Talk，未傾到感情煩惱。」

作者: 草食男 時間: 2010-10-5 12:20

(05/10/2010)鍾舒漫掃潮佬底橫冧Mr.Right[太陽報]

Sherman經過男裝內褲專門店時駐足挑選，未知是否買給另一半？

曾自爆有心儀結婚對象的英皇女歌手鍾舒漫（Sherman），日前到潮店專攻男裝，還駐足細看男裝內褲，未知是否買給Mr.Right？其後，Sherman相約好姊妹泳兒Girl's Talk，更頻頻向泳兒吐苦水，莫非是為情所困？

入行至今，除了曾與同門的張致恒傳緋聞外，Sherman的緋聞寥寥可數，故File亦算「乾淨」！去年憑《給自己的信》成功上位的她，工作量倍增，感情生活亦似有着落，早前更自爆有心儀結婚對象，但「真命天子」至今仍未曝光！

Shopping是女人的天性，難怪Sherman分外落力，揀完男裝再揀太陽眼鏡。

Sherman日前以型女Look到尖沙咀潮店「gi+」購物，未知是否久未血拚，甫進店內即風騷滿場飛，不停試墨鏡、吊帶裙、帽子及飾物等，最後扑錘購下頸鏈及墨鏡。其後，她轉攻男裝部挑選T恤及外套，途經男裝內褲專門店時，更不避嫌駐足研究，未知是否為另一半選購貼身用品？

泳兒（右）與Sherman互相幫對方揀衫，果然是好姊妹！

Sherman和泳兒（左）爭畀錢，結果泳兒爭贏。

落樓梯險仆倒
期間，早已相約齊齊行街的好姊妹泳兒突然出現，二人沿途密密斟，又互相替對方襯衫，滿載而歸的她們更在付款處上演一幕「爭畀錢」，結果泳兒成功爭贏，場面搞笑！不過，離開商場時，穿上厚踭鞋的泳兒落樓梯險些仆倒，幸Sherman眼明手快扶實，才未致大出洋相。經過一輪瘋狂血拚後，「孖公仔」轉往歎糖水滋潤一番，原本心情不俗的Sherman突然愁容滿面，除了用手機無聊玩自拍外，又不時狂發短訊，似乎心事重重，泳兒見狀即拍膊安慰，又將糖水分給Sherman品嘗，令對方稍現歡顏，最後結伴離開。

泳兒（右）落樓梯時險仆倒，幸Sherman眼明手快扶實。

Sherman（左）和泳兒傾心事，期間Sherman愁容滿面，泳兒即將糖水分給對方潤番吓。

打鑼尋意中人
記者事後致電Sherman，問到是否蜜運中？她馬上否認：「心儀還心儀，但未正式有（男友）！（遇到Mr.Right？）物色中！（同泳兒傾感情問題？）都係Girl's Talk，未算係感情煩惱。」問到會否樂意替另一半買內褲？她說：「如果有男友，幫佢揀埋又有乜所謂呢？但依家冇嘛！」

作者: Tako 時間: 2010-10-5 13:13

3間報紙影緊佢地2個都唔知-______-

作者: hlshls15 時間: 2010-10-5 17:14

嘩!!!

作者: Christie 時間: 2010-10-5 20:19

甘多相仲要有正面同甘清楚既Orz
PS最尾舒漫伸利個張好得意XDD

[ 本帖最後由 Christie 於 2010-10-5 20:20 編輯 ]

作者: jobie02_28 時間: 2010-10-5 22:23

引用:

原帖由 Christie 於 5-10-2010 20:19 發表
甘多相仲要有正面同甘清楚既Orz
PS最尾舒漫伸利個張好得意XDD

I think so~so qute~

作者: mamaclovis 時間: 2010-10-8 16:06

Wow... g!+... my favorite store too!

作者: Lyh 時間: 2010-10-8 18:27

要向好的角度去諗!!!
小Sherman好受歡迎!!!

歡迎光臨 Sherman Forum 鍾舒漫國際歌迷論壇 (http://forum.chungsherman.com/)