Sherman Forum 鍾舒漫國際歌迷論壇

標題: (28/01/2011)鍾舒漫搏命搵銀還樓債[2份報導] [打印本頁]

作者: 草食男 時間: 2011-1-29 14:09 標題: (28/01/2011)鍾舒漫搏命搵銀還樓債[2份報導]

(28/01/2011)鍾舒漫搏命搵銀還樓債[東方日報]

鍾舒漫（Sherman）最近「升呢」做業主，不過因供樓負擔大，不得不開源節流，除要向公司抓撈增加收入外，就算出埠度假也要施妙計減低成本，實行「慳得一蚊得一蚊」。

Sherman入行三年多，去年終於賺到第一桶金，可以置業一嘗做業主滋味，雖然她的新居非豪宅，但市值約數百萬元，故獨力供樓的她頗有經濟壓力，Sherman不諱言：「因為要供樓，所以平時要慳啲，仲要努力啲搵錢。」

Sherman最近成為業主，負擔大了的她勁接商演騷搵銀。

犧牲假期
她透露本計劃於農曆新年放假出埠旅行，首選度假地是又平又好玩的泰國，可是得知公司為她接了新加坡騷時，便索性轉移到星洲玩幾日，她說：「為咗慳幾千蚊，我取消泰國之旅，打算喺新加坡做完騷後，自己留低玩幾日，咁就可以慳番機票錢。」Sherman以往不會接新年騷，可是今次酬勞太吸引，加上她的確「等錢使」，故不得不忍痛犧牲假期，她又說：「依家都有幾日玩，個心會開心啲囉。」

主動抓撈
除旅行要精打細算外，她稱過去多年不會太緊張工作表，但現在她「唔食都要供樓」，故她每逢看見工作表「空洞洞」時，也會主動開口問經理人可否幫她多接商演騷。問她後悔買樓？Sherman表示絕不後悔，因一直希望可以改善生活質素，況且她覺得租樓不划算，既然現時年輕有經濟能力，買樓是最有回報的投資。

Sherman農曆新年會到新加坡旅遊。

作者: 草食男 時間: 2011-1-29 14:15

(28/01/2011)鍾舒漫搲Job供樓大過天[太陽報]

鍾舒漫去年成功賺到第一桶金，適逢當時樓市降溫，她趁機上車做業主，可是「供樓緊過債」，故本是慳妹的她，不得不諗盡縮數兼自薦接Job增「錢」途！

每年農曆新年，鍾舒漫例必「收爐」放假，可是近期卻轉性狂接工作，十足發錢寒！問到為何如此恨錢？她說：「咪因為供樓囉！雖然我層樓唔係南區豪宅，但市值幾百萬，我一個人供都幾吃力，所以要搵多啲錢，唔食唔着都要供樓嘛！」

新加坡開工兼度假
鍾舒漫表示去年年中本打算在今個農曆新年到泰國旅行，貪機票平兼消費低，可是年底買樓後，大感銀根緊絀，故破例接新加坡騷，最開心是除酬勞豐厚外，更可因利乘便到新加坡玩幾日：「知道去新加坡，我個泰國之旅都取消埋，開完騷我自己會留喺當地放假，咁做連機票錢都慳番！」

為增加收入，鍾舒漫主動要求公司增加工作機會，以往她不會太在意工作多寡，但置業後她視工作表如日記，經常細看可有「空檔」，如發現有空餘時間即開聲要求經理人「做嘢」，為她開拓財路。雖然工作及壓力增大，但她從沒後悔買樓，因她覺得投資樓宇是最有回報的理財策略。

鍾舒漫深信買樓是最有回報的理財策略，故要努力賺錢供樓！

鍾舒漫在農曆新年仍要密密接Job搵銀。

為開闢財路，鍾舒漫主動要求增加工作。

作者: mamaclovis 時間: 2011-1-29 14:48

SHERMAN有没有机會拍电影或TVB剧集呢？好想睇呀！

作者: nym 時間: 2011-1-30 00:31

近睇shersher個樣有d疲累呀
做野還做野要有足夠休息
唔好捱壞自己身體呀

歡迎光臨 Sherman Forum 鍾舒漫國際歌迷論壇 (http://forum.chungsherman.com/)