Sherman Forum 鍾舒漫國際歌迷論壇

標題: (01/04/2011)Sherman紓壓畫阿婆裸體[2份報導] [打印本頁]

作者: 草食男 時間: 2011-4-2 00:05 標題: (01/04/2011)Sherman紓壓畫阿婆裸體[2份報導]

(01/04/2011)Sherman紓壓畫阿婆裸體[太陽報]

鍾舒漫（Sherman）對新碟要求甚高，壓力相應大增，要透過畫畫減壓，她笑說：「細個時為咗畫畫唔食飯，阿媽以為我有自閉症添！」她自爆最難忘是曾為一名阿婆作人體素描。

近月埋首籌備新碟的Sherman，由於唱片公司對她寄厚望，故她揚言壓力相當大，幸好她自有一套減壓方法：「就係畫畫。自細我已經好鍾意匿埋畫公仔，試過飯都唔食匿埋喺房，阿媽擔心我自閉。」鍾母後來知道愛女迷上畫畫，在她就讀六年級時，便送她上堂正式學畫。

「美女」不等於「美感」
Sherman變身導師教粉絲畫畫入門，她提議有志學畫者可買深色畫筆，學習畫線條：「唔使一定限住自己畫乜，亂畫都得，當年我就係乜都畫一餐，打好畫線條嘅基本功。」問她最難忘的畫畫經驗？她首選在外地留學時上人體素描堂，皆因當時的模特兒是一名全裸的婆婆，她憶述：「嗰時幾尷尬，面都紅晒，但佢好專業，一啲都唔怕醜，好自然，由佢演繹一啲都唔會覺得色情。」

Sherman表示在藝術角度而言，並非一定要有年輕貌美的女模才能畫出有美感的人體素描，反而婆婆的皺紋都可以很美。

鍾舒漫唱得畫得，作品水準有番咁上下。

Sherman向畫畫初學者教路，分享竅門。

每當遇到壓力，Sherman都會畫畫減壓。

[ 本帖最後由草食男於 2011-4-2 00:10 編輯 ]

作者: 草食男 時間: 2011-4-2 00:09

(01/04/2011)鍾舒漫迷戀畫婆婆裸體[東方日報]

鍾舒漫（Sherman）除了醉心唱歌、跳舞外，亦愛畫畫，她自爆童年時因畫畫而廢寢忘餐，其後在外國留學時，在母親支持下學習人體素描，由於模特兒是全裸上陣，故令她邊畫邊面紅。

Sherman的母親是女高音，而妹妹則是往台灣發展的歌手，原來Sherman除遺傳了家族的音樂細胞外，亦具畫畫天分，她說：「我細細個就好鍾意畫公仔，試過為咗畫畫，我飯都唔食，媽咪見我成日匿喺房都好奇怪，後尾先知我忙畫畫。」母親培育愛女發揮所長，自六年級開始，就送Sherman上畫畫班，其後的作品屢獲讚賞。

棄用年輕美人
之後分別到美國及英國留學的Sherman繼續深造畫功，最難忘一次是和一大班男女同學上人體素描班，她說：「嗰時都幾尷尬，面都紅晒，因為模特兒係全裸，仲係一位上咗年紀嘅婆婆，但佢好專業，一啲都唔怕醜，表現好自然，由佢演繹一啲都唔會覺得色情。」

Sherman又謂相當佩服全裸模特兒的勇氣，因為要在一大班人面前一絲不掛，實在非人人可以做到。問她為何不搵年輕美人當模特兒，Sherman卻認為學過人體素描後，對審美另有觀點，她稱：「其實婆婆都好有美態，喺藝術角度，連婆婆啲皺紋都可以好靚。」

初學由線打底
問Sherman可有畫素描畫的心得？她覺得畫具最重要，初學者可以先買一條深色畫筆，用作練畫線條之用，她以專業口脗說：「用嚟學畫條線先，亂畫一通都得，學識咗最簡單嘅線條，打好個底後，學畫畫就事半功倍嘞！」

藝術世家的Sherman除了唱得、跳得外，原來都好畫得！

Sherman小時因畫畫而廢寢忘餐。

作者: emily_wwt 時間: 2011-4-2 19:16

D畫真係好靚呀!!!!!!!!!!

作者: R.Ng 時間: 2011-4-2 20:59

希望見到舒漫更多畫畫嘅作品~~~~~~~~~~~~

作者: 明治 時間: 2011-4-2 21:04

戈個人像是誰？？@@

作者: thomas1029 時間: 2011-4-4 11:50

sher畫d畫真係好靚,全部都好colorful

作者: a-yu 時間: 2011-4-7 22:25

sher畫畫真係好勁!!
我都好鐘意畫畫ga!!
有朝一日可以好似sher畫得咁好就好la

btw..如果可以拿到sher親手畫ge畫實開心到喊><

歡迎光臨 Sherman Forum 鍾舒漫國際歌迷論壇 (http://forum.chungsherman.com/)