容祖兒御准 林欣彤 400萬賣身楊受成
2010年09月29日
第二屆《超級巨聲》落幕兩週，冠軍林欣彤（ Mag）人氣繼續上揚，人人以為小巨肺被無綫縛死 8年當係寶，本刊獲得獨家消息，英皇以香港樂壇史上新人天價 4百萬，成功利誘無綫賣女！
以為英皇御准要睇老闆楊受成頭，原來還得靠金蛋一姐容祖兒開綠燈召新女入宮，背後無非為要擠走眼中釘泳兒同鍾舒漫。巨肺變小花，林欣彤賣聲之餘，可能日後要學吓點樣宮心計先得喇！
首屆《超級巨聲》由內地歌手王雯獲得，香港人點都難投入，所以全陀地嘅巨聲二班人氣高幾條街，尤其 20歲的 IVE學生林欣彤愈戰愈勇，唱紅 G.E.M.首〈 A.I.N.Y.〉再攞埋冠軍，一夜間成為全民偶像，面書支持者過十萬、 TVB官網人氣強過小生花旦，唱得又有觀眾緣，未出道已盛傳有 9大廣告商、兩部電影搵上門，各大唱片公司揸 fit人更加吼實。
各大唱片開出的搶人條件中，以英皇同東亞最啱 TVB嘴形，不過又以楊受成一口價最得 TVB歡心，唯一斟酌係英皇開出要同 TVB共同擁有林欣彤的經理人合約，將來為林接 job有錢齊齊搵，免幫 TVB義務養女。
楊受成@英皇一口價
4年 400萬
*與無綫共同擁有經理人合約
林建岳@東亞簽 5年
首年 20萬，每年加 20萬
5年共 300萬
睇錢份上
參加《巨聲》初，所有參賽者先要簽下協議，不論輸贏三年內不得參加同類型比賽、不得簽約其他娛樂公司，三甲勝出者更是除了無綫別無他選。
不過今屆情況明顯因為林欣彤有變，被網友熱捧聲靚、感染力勝過專業歌手的林欣彤，竟然被多間唱片公司出價力爭，部分企圖靠誠意打動的小型唱片公司早被無綫拒絕，最後只是東亞、英皇兩間龍頭娛樂公司之爭。據知東亞斟酌與林欣彤簽下五年合約，首年 20萬酬勞、再逐年加 20萬共 300萬已相當吸引，但都未夠英皇一口價 400萬 4年合約史無前例大手筆，誓要搶贏林欣彤。
問准一姐
今屆《巨聲》人氣高企，業內人士及不少藝人歌手都是 fans，未到決賽，英皇娛樂行政總裁吳雨已經公開表示主動搵過樂易玲傾合作：「睇電視已經覺得佢表現好好、有觀眾緣，把聲又好靚好有潛質，不過而家只係商討階段，未講細節！」
據悉吳雨口中的細節，其實是未知英皇一姐容祖兒意下如何，原來祖兒亦一直有留意 Mag在《巨聲》中的演出，舉腳贊成英皇多簽唱得的女歌手，容一姐更曾在會上說：「要簽梗係簽啲唱得嘅返嚟啦！」獲得一姐首肯兼老闆正式拍板，吳雨才去馬與樂小姐傾細節。
鏟除異己
據知情人士透露，唱功了得以外， Mag年紀小、經驗淺，由容祖兒御准加入英皇後，理所當然埋自己堆，最重要的，還是能趁勢鏟走泳兒、鍾舒漫兩個眼中釘：「泳兒恃住楊生錫又唱得，竟然喺公司挑戰祖兒擺一姐款，佢哋兩個不和好耐！所以祖兒同英皇續約，首要條件就係泳兒入冷宮。而全公司個個埋祖兒堆，係鍾舒漫黐泳兒，梗係當佢哋兩個係同黨啦！泳兒同鍾舒漫兩個不嬲搵唔到錢，已經危危乎，簽咗 Mag返嚟， 2011預算案一定係集中資源力谷，唔會有錢剩畀泳兒同鍾舒漫出碟，咁咪可以鏟走眼中釘囉！」
一舉兩得之下，一姐祖兒舉腳贊成簽小巨肺，現時還未落筆，是因為英皇提出要與無綫平分（共同擁有）林欣彤經理人合約的要求，尚在拉鋸之中。不過錢最親嘅無綫，睇怕好易妥協。
紅透無綫
人氣急升的林欣彤決賽晚以大熱姿態獲得冠軍，兩週以來所到之處都是焦點， facebook多個群組粉絲累積過 10萬，而 TVB官網累積瀏覽人次逾 170萬，連無綫藝人 blog排行榜都力壓佘詩曼、林峯等當家小生花旦名列第一。
一姐只得一個
出道 10年的容祖兒是英皇第一代小花，又是愈戰愈勇的樂壇天后，兼且係英皇金蛋，老闆楊受成、金牌經理人 Mani錫到燶，師妹師弟個個爭埋堆，惟獨泳兒斗膽自認一姐、鍾舒漫敵我不分，成為一姐眼中釘。
近年泳兒和鍾舒漫投資多但回報率少，可以賺錢機會微，加上兩人唱片的銷量也是 5,000左右，冇肉食。
鍾舒漫︰阿 Mag唱歌好西化，好獨特，但我就冇聽過佢會做我師妹囉，做好自己本分，我唔會諗會唔會因為佢自己就冇得出唱片……
賣女經典
1998年，年僅 18歲的張栢芝從澳洲求學回港，被朱永龍發掘簽為旗下藝人。甫出道即演出檸檬茶廣告再被周星馳睇中出任《喜劇之王》女主角，迅速成為歌影紅人， 03年栢芝與朱永龍鬧翻對簿公堂，一年後達成協議停止訴訟，有傳是栢芝靠向太（中國星）出手，出價 400萬贖身費才讓朱永龍放手賣女。
新人天價
依照常例，香港樂壇新人由簽約計起，受訓、化妝、髮型、置裝及交通一概先由公司墊支，賺錢後再攤還。今時今日唱片市道差，新人就先靠出碟打響名堂，拍廣告、拍戲、登台、出席商場活動才是收入來源，為保利潤，現時多數唱片公司同時擁有藝人經理人及唱片合約，林欣彤未出道，無綫已隨時收英皇 400萬賣女費，經理人合約仲要同兩家攤分，咁林欣彤就預咗未來四年年中無休搵銀，英皇先回本！
採訪、撰文：娛樂組
攝影：攝影組
