自言要養家的Sherman，很多時都會慳住使錢。
鍾舒漫（左）感激祖兒獻聲與她合唱。
鍾舒漫今年來個大突破，將長髮剪短，更見清爽。
Sherman表示對下一張專輯冇壓力。
鍾舒漫曾在《十大勁歌金曲頒獎禮》奪最受歡迎女新人銅獎。資料圖片
Sherman首個簽唱會，吸引大批Fans捧場。
Sherman以勁歌熱舞俘虜樂迷。
向來以勁歌熱舞及性感形象見稱的鍾舒漫，今年來個大突破，除將秀髮剪短，還嘗試以慢歌派台，結果一擊即中，Hit爆「升呢」，連天后容祖兒也獻聲與她合唱，令她不再局限跳舞框框。
鍾舒漫（Sherman）過往以勁歌熱舞俘虜樂迷，今年卻「唔聲唔聲」，爆出一首慢歌《給自己的信》，令她發夢也沒想過，還自爆當初扭計，不太想將此歌派台：「因為今次專輯多咗自己作品，我想Sell自己歌多啲，起初Plug呢首歌，我有啲卻步，但公司同事覺得首歌有潛質，又有訊息帶到畀歌迷，最後我聽取公司意見，同公司攞咗共識，估唔到首歌反應咁理想。」
得獎當Bonus
對於新歌Hit爆，Sherman說：「實屬正常，翻查過往頒獎禮歷史，爆親都係慢歌，但其實快慢都好，最緊要係好歌。（代表作？）可以咁講，喺叱咤榜攞到人生第一首冠軍歌，所以好開心。」
《給》的威力，除令Sherman人氣急升外，就連師姐兼樂壇天后容祖兒，也對此歌讚賞有加，Sherman雀躍地說：「祖兒好好，佢好鼓勵我，有次佢問我首歌成績點樣，我話喺流行榜上上落落咁，佢就即刻話：『咁唔得喎！要搞搞佢。』轉頭就同我合唱呢首歌，佢好支持我。」
對於有機會問鼎歌曲獎項，Sherman謙稱：「信心唔可以話十足，不過有期望，因為始終有變數，有時會作最壞打算。（咁消極嘅？）都唔係，有獎攞當Bonus，就算食白果，都要開心咁去面對，最緊要歌曲受落，人哋睇到你努力同進步嘅成果，嗰種滿足感更加大。」
壓力變動力
問到會否對下一張專輯構成壓力？Sherman說：「唔會，反而係原動力，今次多咗自己作品，反而為我打開咗多道門，公司亦放膽畀我去試寫多啲歌。」
Sherman不諱言已寫信，送給10年前的自己和10年後的自己，她說：「10年後嘅自己係要想像，到時結婚未？係低谷抑或係高潮？其實讀書時都鍾意寫信，因為嗰時都未興MSN同SMS。」問到今年是否賺錢多了？她笑說：「多咗啲啦！但同時壓力亦大咗，以前冇咁多家庭負擔，但媽咪已經退休，自己要負責養家，所以好多嘢都要慳住使。」
長變短萬事「髮」
鍾舒漫將留了一段頗長時間的長髮「狠心」剪掉，變成現時清爽的短髮，贏得不俗評價，她不諱言想轉Look多時 ：「我想剪髮成年，而且呢個髮型都可以變『髮』多端。」至於剪完後有否覺得諸事皆順？她笑說：「我又覺得唔關事，我相信實力多啲。」
粉紅女愛小孖星
鍾舒漫向來予人狂野冷艷感覺，故以為她喜歡黑白灰冷酷顏色，但原來Sherman對粉紅色情有獨鍾，兼且情迷Little Twin Stars，真的估不到！Sherman說：「個個都以為我鍾意Cool嘅顏色，所以當佢哋知我鍾意粉紅色，反應都好大，哈哈！其實我天生鍾意粉紅色，因為粉色系列畀人感覺好Warm、好舒服同好Sweet！」
[
本帖最後由 ｙinn 於 2009-12-5 11:46 編輯 ]
