FACEweekly
霆鋒智叔 Like 鍾舒漫
2010年08月04日
自上年尾〈給自己的信〉愈唱愈紅，成為人人 K歌，上月尾又推出《樂活。道》，寫寫畫畫 8篇文分享工作及愛情觀。唱而優則寫、寫而優則演，今天訪問的 Sherman除了推出新碟《 One Mission》外，嚟緊 8月尾更有電影《線人》上映，新手上路，今日就打正旗號問佢電影觀先！
感恩大氣候
上年尾〈給自己的信〉唱足一年， Neway家吓熱唱榜仲係排第 8，勵志曲果然好收視， Sherman上星期四推出新碟《 One Mission》，話到明承接背後精神，「上次整套作品用來祝福身邊人，今次探討是做人態度。新碟內十首歌講做人的 10種態度，面對自己的目標。」一向是虔誠教徒的 Sherman自然好發揮，「最喜愛阿 Deep作的〈拼圖〉。講人生由好多身邊人拼湊出來，做每件事都需要身邊人幫忙，我們需要感恩。」就好像書《樂活。道》一樣，「冇 budget之下都有 Mandy（蔣雅文）拍心口幫我完成，好感動。」對白熟口熟面，當日訪問 Jin同 Hanjin的《買一送一》大碟，兩者同樣說要多謝身邊人支持幫手，才出成碟，不是同你說教，而是感恩之心絕對值得學習。
Sherman Movie's Pick
最喜愛電影︰《鐵達尼號》
「中學時期最愛，一對情侶生離死別好催淚，買咗幾百蚊相集同 soundtrack煲。男主角 Leonardo DiCaprio而家冇以前咁靚仔，但好期待上映中的《潛行凶間》，放假去睇！」
最喜愛男主角︰ Josh Hartnett
「佢係我夢中情人，好 man，由《黑鷹 15小時》到《珍珠港》我都好喜歡。」 3歲已識睇戲，話《英雄本色》周潤發「跛咗」好慘。
最喜愛女主角︰周迅
「好多人覺得《孔子》好悶，但我就好鍾意入面的周迅，戲內她飾演的南子要情挑孔子，好好戲外，周迅本人亦好有氣質！」
最喜愛動畫︰《幽靈公主》
「好鍾意宮崎駿，可以將幻想變成如真人的感情戲，《幽靈公主》的配樂，更令我有衝動即時返屋企彈。」
最喜愛連續劇︰《哈利波特》系列
「中學時期睇過《哈利波特》小說，跟住再睇電影，驚訝同幻想一樣（小說冇畫面要幻想）。最鍾意就係妙麗一角，又靚又醒，張秋真係唔太夾。」
最愛睇戲習慣︰屋企食叮叮
「睇外國大卡士戲，我會去戲院；反而香港電影多小品，我好鍾意屋企欣賞，要校震機唔受外來騷擾，最緊要有叮叮蝦餃同燒賣。」
最愛導演︰ Steven Spielberg
「一向好鍾意史匹堡的戲，既科幻但又真正做到該畫面，近年的寫實戲如《雷霆救兵》亦好賺人熱淚。」也不忙讚《線人》導演林超賢（圖），「就算自己經驗不夠，佢亦畀到信心我，叫我邊試邊改，好畀機會我。」
睇韓片入戲
唱完歌又要拍戲， Sherman夥拍動作導演林超賢新戲《線人》，主角全部係輩分高十倍的謝霆鋒、張家輝、廖啟智，咪話唔怯呀，「戲內我係霆鋒的妹妹，大多都係同佢的親情戲，發覺要喊，真係難過登天。」拍前狂煲喊戲培養感情，「韓國片《姊魅情深》就係講失去妹妹的驚慄片，我嘗試代入失去親妹妹（妹妹係鍾舒祺）的感覺，結果一 take搞掂，喊到暈。你知啦霆鋒又 cool cool哋，好彩拍完第一 take，佢拍我膊頭話『做得幾好喎！』」最近拍過的戲數到 2年前的《愛情萬歲》，自問經驗不多的 Sherman，惟有靠感情搭夠，「為電影唱插曲〈只要待愛好〉前，導演給了我一段張家輝同老婆的感情戲，睇到我喊，鼻水塞住喉嚨唱唔到！」就係一份真，才能唱出冷冷感情，微博童鞋聽完個個讚外，同場電影公司職員亦插嘴，「連廖啟智都點名讚你，話你把握每個機會，用心做戲。」 Sherman呢刻真係開心到喊！
撰文：陳家豪
攝影：謝耀恆
[
本帖最後由 zekezeke 於 2010-8-10 17:58 編輯 ]
